Euskarazko txatbota enpresa eta erakundeentzat

Euskarazko hizkuntza-ereduei buruzko ikerketa bilatzen ari bazara, euskal zentro teknologikoak eta unibertsitateak dira erreferentzia. Gurea aplikazioa da: bezeroak eta herritarrak euskaraz artatzen dituzten txatbotak, erakunde bakoitzaren informazioarekin eta gaztelaniaz bezain ondo.

Zergatik ez du balio itzultzen duen txatbot batek euskaraz

Txatbot askok «euskaraz egiten dute» gaztelaniaz idatzita dutena unean bertan itzultzen dutelako. Elkarrizketa labur batean oharkabean pasa daiteke, baina egunero euskaraz artatzen duenak berehala nabaritzen du.

• Erregistroa: itzulitako erantzun batek gaztelaniaren kalkoa dirudi, esaldi luzeekin eta inork erabiltzen ez duen hitz ordenarekin. Udal batek, hotel batek edo denda batek euskara zuzena eta hurbila behar du, biak batera.
• Deklinabidea: euskaraz izenak aldatu egiten dira esaldiaren arabera. Ez da gauza bera «Beasainen», «Beasainera» edo «Beasaingo udaletxea». Hitzez hitz itzultzen duen sistema batek, hain zuzen, kale, zerbitzu eta herrien izenetan egiten du huts, eta horiexek dira gehien galdetzen direnak.
• Izen ofizialak: zerbitzuek, izapideek eta programek euskarazko izen ofiziala dute. Laguntzaileak itzultzean asmatzen baditu, pertsonak ez ditu gero aurkituko, ez webgunean ez leihatilan.
• Batua eta aldaerak: laguntzaileak batuan erantzuten du, administrazioan eta irakaskuntzan erabiltzen den euskara estandarrean, baina ulertu egin behar du bere euskalkian idazten duena, h-rik gabe, laburdurekin edo gaztelaniazko hitzak nahastuz, mugikorrean benetan idazten den bezala.

Horietako zerbaitek huts egiten duenean, euskaraz hasi dena gaztelaniara pasatzen da edo elkarrizketa uzten du. Udal batentzat, gainera, zerbitzu kontua da: bi hizkuntza ofizialetan berdin ondo artatzea.

Nola egiten dugun

• Lehenik euskaraz probatzen dugu. Laguntzailea zabaldu aurretik, zure erakundeak jasotzen dituenen antzeko galderekin probatzen dugu, euskaratik hasita, hor egiten baitu huts gehien gaizki prestatutako laguntzaile batek. Gero probak gaztelaniaz errepikatzen ditugu.
• Ezagutza base elebiduna. Laguntzaileak zure erakundearen informazioarekin erantzuten du (webgunea, ordutegiak, izapideak, katalogoak, ohiko galderak), bi hizkuntzetan prestatuta eta euskarazko izen ofizialekin. Zerbait aldatzen denean, oinarri hori eguneratzen da, laguntzailea berriz egin gabe.
• Hiztunen berrikuspena. Euskaldunek berrikusten dituzte erantzunak argitaratu aurretik, gaia ezagutzen duen zure taldeko norbaiten laguntzarekin.
• Jarraipena. Hilero aztertzen dugu jendeak zer galdetzen duen eta zer erantzun indartu behar diren.

Prozesu osoa, 30 minutuko doako diagnostikotik argitaratu arte, nola lan egiten dugun orrian dago. Hizkuntzei, kanalei eta epeei buruzko zalantzak ohiko galderetan erantzuten ditugu.

Non erabiltzen den

Udalak eta erakundeak

Udaletan nabaritzen da gehien, herritarrek izapideei, ordutegiei, zerbitzuei eta agendari buruz galdetzen baitute bi hizkuntzetan, eta erantzunak bietan izan behar baitu berdin ona. Hori egiten dugu Arrasateko Udalaren txatbotean eta Loinatzen, Beasaingo Udalaren laguntzailean. Administrazioentzako zerbitzu osoa udalentzako txatbotaren orrian dago.

Hotelak

Euskadiko hotel batentzat, euskaraz idazten duenari euskaraz erantzutea bezeroak gogoratzen duen xehetasuna da. Laguntzaile berak gaztelaniaz eta nazioarteko bezeroen hizkuntzetan ere artatzen du. Gehiago hotelentzako IA orrian.

Akademiak eta prestakuntza zentroak

Ikastaroak, ordutegiak, matrikulak eta ikasleen eta familien zalantzak, euskaraz eta gaztelaniaz, idazkaritza itxita dagoenean ere. Gehiago akademientzako IA orrian.

Dendak eta enpresak

Mostradorean edo telefonoz dagoeneko euskaraz artatzen duten denda eta enpresek webgunean eta WhatsAppen ere egin dezakete, tratu berarekin.

Webgunean eta WhatsAppen

Laguntzaileak webgunean funtzionatzen du, txat leiho gisa, eta WhatsAppen. Proiektu bakoitzak behar dituen kanalak erabiltzen ditu: udal bat bere webgunetik hasi ohi da, eta WhatsApp bidez kontsulta asko jasotzen dituen enpresa batek bertan artatu ditzake. Bi kanaletan informazio berarekin eta euskara berarekin erantzuten du. Telefonoa ere artatu nahi baduzu, euskarazko eta gaztelaniazko ahots-agenteen orrian azaltzen dugu.

Ohiko galderak

Txatbotak gaztelaniatik itzultzen du?

Ez. Hasieratik euskaraz diseinatzen dugu, bere ezagutza basearekin, eta euskaraz eta gaztelaniaz probatzen dugu argitaratu aurretik.

Idazten dioten hizkuntzan erantzuten du?

Bai. Norbaitek euskaraz idazten badu, euskaraz erantzuten du; gaztelaniaz idazten badu, gaztelaniaz. Pertsonak elkarrizketaren erdian hizkuntza aldatzen badu, laguntzaileak ere aldatu egiten du. Webgune batzuetan, udal batenean adibidez, txata irekitzean ere aukera daiteke hizkuntza.

Euskalkian idazten duena ulertzen du?

Jendeak benetan idazten duen bezala ulertzeko prestatzen dugu: euskalkian, akatsekin edo gaztelaniazko hitzak nahastuz. Batuan erantzuten du. Argitaratu aurretik horrela idatzitako galderekin probatzen dugu.

Zer gertatzen da erantzuna ez badaki?

Hala esan dezan eta pertsona batengana edo kanal egokira bidal dezan konfiguratzen dugu, asmatzen hasi beharrean.

Zure galderekin probatuko dugu?

Erreserbatu 30 minutuko bilera bat eta euskaraz erantzuten duen laguntzaile bat erakutsiko dizugu, edo idatzi iezaguzu kontaktu orritik.